Ավելի շատ կանխարգելում, ավելի քիչ բուժում

Ավելի շատ կանխարգելում, ավելի քիչ բուժում. ահա թե ինչպիսի տեսք պիտի ունենա Հայաստանում երեխաների ատամների հիվանդությունների պրոֆիլակտիկայի մոտեցումը։ NEWS.am Medicine-ի թղթակցի հետ զրույցում նման կարծիք է հայտնել ստոմատոլոգ Ջեք Կոյումջյանը Սթենդֆորդի համալսարանից։ Հենց այդ մոտեցումն է ընկած երեխաների բերանի խոռոչում առողջության պահպանման նախագծի հիմքում, որն իրականացվում է Bay Area Friends of Armenia (BAFA) ընկերության նախաձեռնությամբ եւ աջակցությամբ։

Այս նախագիծը, սկսվել է 2 տարի առաջ՝ մասնագետների Մելիք գյուղ այցելությունից հետո, որտեղ երեխաների մեծամասնությունը կարիես ուներ։  Ավելին, շատերին բժշկի էին տանում այն ժամանակ, երբ խնդիրն արդեն բավականին խորացել էր։ Մասնագետները հասկացել են, որ անհրաժեշտ է ինչ-որ բան փոխել։ Անհրաժեշտ է փոխել մոտեցումը այդ խնդիրների պրոֆիլակտիկայի նկատմամբ, ինչի արդյունքում կարելի է խուսափել նման դեպքերից։

Ի՞նչ է անհրաժեշտ այդ հիվանդությունների կանխարգելման համար

Նախ եւ առաջ լինել տեղեկացված և ունենալ համապատասխան գիտելիքներ։ Ոչ միայն ստոմատոլոգները, այլեւ երեխաների ուսուցիչները պիտի իմանան, թե ինչ ապրելակերպ է անհրաժեշտ ձևավորել եւ որքան հաճախակի այցելել բժշկին։

Անհրաժեշտ է երեխային սովորեցնել ճիշտ հետևել ատամների հիգիենային, որպեսզի ամբողջ կյանքում սովորություն դառնա։

Բժիշկ Կոյումջյանը նաեւ նշել է, որ կարիեսի եւ ատամների հետ կապված այլ խնդիրների բուժումը սովորաբար շատ թանկ է արժենում, ավելին՝ արդեն առաջացած դեպքերում ստիպված են լինում հեռացնել երեխաների կաթնատամները, իսկ դա կարող է ապագայում վատ անդրադառնալ ատամների բուժման վրա։ Մյուս կողմից, վաղ փուլում այդ հիվանդությունների պրոֆիլակտիկան կամ բուժումն անհամեմատ ավելի հեշտ է եւ ավելի քիչ ռեսուրս է պահանջում։ Հենց դրա համար էլ այդքան կարեւոր է Հայաստանում կանխարգելման համակարգ զարգացնելը։