Թերապիան կօգնի հաղթահարել ստոմատոլոգների նկատմամբ վախը

Թիմ Նյութոնը ու Լոնդոնի Թագավորական քոլեջի նրա գործընկերները հատուկ թերապիա են մշակել, որը կօգնի երեխաներին ու մեծահասակներին չվախենալ ստոմատոլոգներին այցելելուց: Հիվանդները կկարողանան հաղթահարել դենտոֆոբիան հոգեբանի հետ հինգ սեանսի օգնությամբ:

 

Հետազոտությանը մասնակցել է ընդամենը 99 կին ու 31 տղամարդ, որոնք տառապում էին դենտոֆոբիայով: Ատամնաբույժներից վախեցող մարդիկ ավելի հազվադեպ են այցելում բժշկի: Հենց այդ պատճառով էլ նրանց ատամների վիճակը շատ ավելի վատ է, քան կանոնավոր կերպով ստոմատոլոգի այցելողներինը:

 

Թերապիայի հիմնական տարրն է դարձել այն թեսթը, որը բրիտանացի բժիշկներին թույլ է տվել պարզել, թե հատկապես ինչն է վախեցնում փորձի մասնակիցներին ու կոգնիտիվ - վարքագծային թերապիայի սեսիաների ժամանակ ավելի նպատակաուղղված պայքարել այդ վախի դեմ: Հետազոտողների խոսքով, մասնակիցների մեծ մասն ընդհանրապես վախենում է ատամնաբուժությունից, ու միայն մի փոքր մասն էր վախենում հատկապես ներարկումներից, նյարդերը հանելու կամ էլ ատամնաբուժական այլ բուժակարգերից:

 

Հոգեբանի հետ չորս- հինգ սեսիաներից հետո հինգ մասնակիցներից չորսը ազատվել էին ատամները բուժելուց առաջ հանգստացնող դեղամիջոցներ խմելու անհրաժեշտությունից ու ատամնաբույժների նկատմամբ իրենց վախից: Ֆոբիաների հաղթահարումը բարենպաստ էր անդրադարձել նաեւ նրանց ատամների ու բերանի խոռոչի առողջության վրա, քանի որ նրանք խնդիրներ ունենալու դեպքում արդեն ավելի հանգիստ էին դիմում ատամնաբույժների օգնությանը:

 

NEWS.am Medicine