Մաստակն ունակ է 100 միլիոն մանրէ բռնել

^05.02.2015

Նիդերլանդացի գիտնականները պարզել են, որ մաստակը կարող է մաքրել բերանի խոռոչը հիվանդածին մանրէներից: Ծամոնի մեկ սալիկն ունակ է 100 միլիոն մանրէ բռնել (թքի պարունակության միկրոօրգանիզմների միջին քանակի 10 տոկոսը): Հետազոտությունը հրապարակվել է PLoS One ամսագրում:

Փորձարկումներից մեկի ժամանակ կամավորների բերանի խոռոչ սահմանափակ քանակությամբ մանրէներ են բաց թողել, որից հետո մարդկանց խնդրել են տասը րոպե մաստակ ծամել: Ծամոնի յուրաքանչյուր սալիկին մոտ հարյուր միլիոն մանրէ է բաժին հասել: Բռնված մանրէները տեսանելի են եղել սկանավորող էլեկտրոնային մանրադիտակի միջոցով ստացված պատկերների վրա: Սակայն օգտակար է միայն առանց շաքարի մաստակը. քաղցր նյութերը բերանի խոռոչում եւ ատամների վրա բնակվող մանրէներին պարզապես սնում են:

Առավելագույնս արդյունավետ է առաջին 30 վայրկյանի ընթացքում օգտագործվող ծամոնը, հետո մանրէներն ավելի դժվարությամբ են բռնվում: Ավելին, անդադար ծամելու դեպքում միկրոօրգանիզմների մի մասը վերադառնում է բերանի խոռոչ, հաղորդում է Daily Mail-ը:

Իրականացված հետազոտության հիման վրա գիտնականները հույս ունեն ընտրողաբար գործող եւ բերանը մանրէների որոշ տեսակներից մաքրող մաստակ ստեղծել:

Բոլոր Նորությունները

Ատամնաբուժարաններին